هاشتاغ سوريا_ميسون حداد
لاقت الخطوة التي قامت بها محافظة دمشق، بوضع صهريج تدخل لبيع مادة البنزين المدعوم في منطقة باب توما، الكثير من ردود الفعل المستهجنة والمتهكمة من قبل رواد وسائل التواصل الاجتماعي.
وجاءت التعليقات تحمل أيضاً استنكاراً لتخصيص المحافظة الصهريج، للقضاة والأطباء والضباط المتقاعدين حصراً دون غيرهم.
كما عكست التعليقات قلة ثقة المواطنين بهذه القرارات والتدخلات الجزئية والمرتجلة والتي تشبه “الترقيع” حيث تمزق الثوب، في ظل وجود أزمة كبيرة بتوفر البنزين المدعوم في الكازيات، ولا حلول جذرية ملموسة حتى اليوم.
ومن التعليقات المستنكرة للفئوية في القرار والواردة على الخبر المنشور على صفحة المحافظة على فيسبوك..
*- يعني يلي طالع هالقرار يا أجدب يا عم يجدبها، القاضي ولا الدكتور بيستهلكو بنزين متل غيره
ما بالاساس ما بيقفو عالدور ولا بيقفو عالحاجز ولا بتخالفو ومالهم من عامة البشر وكمان بدكم تميزوهم اكتر..والله عيب..حاجه استخفاف بالمواطن وكفايه ذل للمواطن”
*- إنتوا وفروا البنزين للكازيات وبعدين حطوا تدخّل سريع..بعدين الطبيب فيه ياخد تكسي إذا مامعو بنزين..والقاضي بيعبي من الطرنبة تبع القطاع الحكومي..والضابط المتقاعد خلص تقاعد ما عم يروح على شغلو قاعد بالبيت..خصصوا للتكاسي العمومي يلي عم يوقفوا ٨ ساعات عالكازية ليعبوا..
*- و التاجر و الصناعي و شوفير التكسي و الموظّف و المعتّر انشالله ستين عمرون ما يعبّو
*- عيب هالتمييز، كيف بدهن يشعرو بالناس و وجعهن اذا قعدوا ببرج عاجي
*- ياريت تنحل ازمة البنزين لانه بهي الطريقة القاضي والطبيب وغيره مع احترامنا للجميع بيبطل يحس حاله واحد من الشعب ومابيهتم للمعانات يلي بيعانيها الشعب يعني خليه يحس حرام بركي بتزيد الانسانية بقلبه.
*- بلدنا خيار وفقوس دائما لن نتغير كل اجراء اسوأ من سابقه وكلها تقوم على الاستنسابية والانتقائية والانتفاع والتنفيع.. ان الله لا يغير ما بقوم حتى يغيروا ما بأنفسهم.
أصحاب الأعمال و الشهادات الأخرى كان لهم حصة من التعليقات المستهجنة لتخصيص صهريج البنزين لأعمال وشهادات معينة، علماً أن أزمة البنزين تطال العامة قبل أصحاب المناصب الذين يستطيعون تدبر أمورهم بشكل أفضل من غيرهم.
*- لندرس طب مشان تنكة بانزين
*- خلص هيك بطلت الدكاترة تهج شو هالرفاهية
*- والمواطن شو مشانو مو كل الكازيات فيها خط عسكري والشرطه كلن عم يقبضو ٥٠٠٠ من السيارات المدنيه وعم يفوتو عسكري فرطوها بئا حاج
*- طب وعملو صهريج للمحامين والمهندسين، وصهريج اصغر للمعون بكلوريا وصهريج صغيرون للي معون تاسع، و بدون لجماعة السادس
*- ياريت تبعتولنا صهريج مع طرنبه خاص بالمحاسبين حصراً ولكم جزيل الشكر ..
*- نطالب بصهريج خاص للمهندسين…ماحدا أحسن من حدا…
آخرون طالبوا المعنيين بالتعبئة ببيع بطاقاتهم، هذه المطالبات تأتي من واقع الحال، ومن التجارب السابقة، حيث أصبح لدى المواطن السوري مخزون كبير يخوله أن يعرف دون تفكير، أن أي تخصيص لفئة ما، يقابله بيع المخصصات في السوق السوداء، وكأن هذه القرارات تأتي من باب فتح سوق للمعنيبن الذين تطالهم القرارات، وباب للفرج للمواطن من الانتظار ولو دفع مبالغ إضافية تقيه شر الانتظار الذي بات يأكل من عمره مع كل مادة أساسية يحاول الحصول عليها.
*- إعلان للقضاة والاطباء والضباط المتقاعدين مين ببيع بطاقته وبالمرة يبيعنا الدور.
*- اي بكرا منلاقي نص البلد قضاة واطباء وضباط متقعدة وداكترا بل واسطة ودفع لمصاري كلو بصير من هدول
أما أهالي المنطقة فقد اشتكوا من فكرة زيادة الازدحام و الضجيج خاصة بوجود كازية قريبة في المنطقة ..
*- يعني ما بكفي محطة مينا وقرفها وازعاجها لسكان المنطقة ليل نهار كمان صهريج بمرآب الصوفانية بشرفكن ارحمونا
بعض أهالي الأحياء الأخرى في دمشق، أو المحافظات الأخرى، فيبدو أن ثقل أزمة البنزين جعلتهم يجدون في صهريج التدخل لبيع البنزين باب فرج.
*- ياعمي لاقو حل لطريق كورنيش الميدان بسبب الكازيه كل ما عم يمشي الدور سيارة عم بتسكر الطريق ساعه ونص والعالم عم تتقاتل لاقو حل للسيارت المصفوفه ومتروكه خلي العالم تنيم سياراتا بغير مكان حتصير جرائم لانو
*- ليش هيك حلول بس بلشام بتنوجد ماباقي المحافظات كمان فيها ضباط متقاهدين وقضاة ودكاترة