رسالة (حب) من معارض خارجي برتبة (مسؤول) الى مواطن داخلي برتبة(مسحوق) بقلم زاهر حجو !

تم النشر في: 2015-02-14 15:46:00

عزيزي المواطن :انت وانا قصة حب لاتنتهي،ومابتنحصر بيوم عيد الحب :اعاده الله علينا وعليكم بالخير والله (يرحمك) ويرحم فالنتاين ، و دوماً همومك هي همومك، ومع اني اليوم عم احتفل مع صاحبتي بالفالنتاين بس قلبي معك مو معها، و حتى لما كون عم دور العالم كله (سياحة) على شكل مؤتمرات, بتضلك ببالي، يعني: كل ما انقطعت الكهربا (عنا) بالسويد بتذكر معاناتك مع الكهربا، ووقت بكون باسطنبول وبتنقطع المي فيها بتذكر كمان معاناتك مع المي ببلدنا، و لما كون بباريس عم احضر فلم رعب وقطع روس, بتذكر فورا معاناتك مع داعش، و لهل الاسباب سماع مني هل كم كلمة: انت خلي مشاكلك تزيد ساعة بعد ساعة، وانا رح روح جنيف احضر مؤتمر واشتري احلى ساعة، انت تشرد: وانا بنام بافخم الفنادق، انت جوع و انا باكل عني وعنك، انت بعات ابنك للموت و انا ببعت ابني عأرقى جامعات اوربا و العالم، انت كول العصي و انا بعدّ عنك، انت خلّي بيتك ينقصف و ما يضل فيه حجرة على حجرة و يروح كلشي و انا رح اوصل للكرسي، انت روح عبنك الدم لتتبرع لأهلك المصابين و انا بروح عالبنك لأجمع تبرعات و اقبضهم بنفس الوقت لي بكون (عزرائيل) قبض روحك، وعكل انت موت و انا بتاجر بدمك وببكي دموع تماسيح، بس صدقني الثورة بدها تضحية، وبما اني ثائر(بلا تشابيه) قررت ضحي فيك، متل مابضحوا بالغنم بعيد الاضحى (كمان بلا تشابيه) و happy valentine ........!!